【Now財經台】在山東從事港口相關業務嘅日照港裕廊(06117)，股價今早(30日)平開後，突然抽升，一度升逾31%，高見1.08元，由毫子股變身蚊股，成交股數較過去100日平均大增63倍，暫時成交金額逾5000萬元。
日照港裕廊一向消息唔多，股價今日異動主要係中美確認貿易談判有進展，股份上次出現異動已經係啱啱上市時，亦係2019年中美第1次開打貿易戰，中美關係緩和後。
不過，集團一向業績平平，但勝在有穩定派息，一直維持逾3厘，不過，由於冇增長憧憬，股價急升後亦回落得好快，要小心股價突然掉頭急插。
