【Now財經台】比特幣(Bitcoin)及美國科技股喺2024年都有好表現，其中，Bitcoin價格屢創新高，一度高見10.8萬美元水平，美股方面，納指去年累升約29%，跑贏大市。展望2025年，投資主題係咪同2024年差唔多？Bitcoin價格及美國科技股係咪可以繼續跑出？
資深銀行家劉卓衡估計，Bitcoin喺2025年會瘋炒，主要受美國政策帶動，同初期比較，依家Bitcoin嘅理念已經完全唔同，依家只係一種純炒賣嘅資產，風險亦相對較高。佢又預期，今年Bitcoin價格或炒上10萬至20萬美元，但機率唔會超過50%。
美國科技股方面，劉卓衡續指，只要企業盈利可以跟得上，科技股今年係可以睇高一線。
臻享顧問董事總經理王良享則指出，相比4至5年前，依家整個虛擬貨幣生態圈明顯健全，雖然Bitcoin價格喺2024年係因為「Trump Trade」而炒上，但即使獲利回套，下跌空間都有限。
美國科技股方面，Tommy續指，人工智能(AI)係劃時代產物，由於市場對呢類公司嘅業績要求高咗，導致過去2至3個月，相關股份嘅股價升勢幅放緩，例如微軟(Microsoft)。中長期而言，仍睇好美國科技股，佢估計，呢類股份今年波幅或會擴大，不確定性亦會增加，例如關稅、通脹會產生負面影響。
資深銀行家張泰強就認為，由2025年初開始計，Bitcoin將會有3個月「蜜月期」，但第1季後，投資者必須小心關稅及通脹帶嚟嘅影響。
