盤房來料丨港股暫未能扭轉向下弱勢

【信報財經新聞】全球三大AI巨頭舵手罕有地同一鼻孔出氣，同意放慢AI模型發展步伐，觸發AI相關股份初拋售，反而係網絡安全股有炒作，不過國際油價進一步攀升，美國10年期債息自2023年10月以來升破5厘心理大關，拖累美股周一受壓，三大指數收市均見下跌。道指高開177點後，隨即轉跌最多294點，低見52278，收市道指跌152點或0.29%，報52421；標指跌37點或0.48%，報7619；納指跌146點或0.56%，報26186。

晶片股為跌市重災區，MU、應用材料及英特爾收市跌幅介乎5.3%至7.1%，本來MU擺咗個930買盤，但未開市都係決定取消，等開市再睇，結果一開直插到903附近低位，其實900唔穿條100MA即890可以博下，但阿Man都決定放棄，皆因條50MA穿咗，都係睇多兩日先算。NVDA股價跌3.4%，落到210水平，啱啱喺條50同100MA附近，同樣睇多一兩日先，反正NVDA有貨底。DELL就夜盤已畀佢止賺咗個550，其實都算硬淨，收到仲守到530樓上，叫做險守5MA，若然有500邊，或者會撈返550食咗糊嗰一注。連DELL都止賺咗，暫時短炒得返一隻GOOG，幸運地係少數噚晚上升嘅科技股，328買嘅貨，上到340水平，反彈目標先睇條100MA，356企得穩，下一目標係370-3800。至於下方仍然欫20做防守。

BAC行政總裁Brian Moyniha表示，集團第三季銷售與交易收入按年將表現「相對持平」，消息拖累美銀股價急挫5.1%。FOMC本周議息，其實市場都有晒心理準備，今次或加息0.25厘，加息周期開始與否仍未確定，打後都係要睇住通脹數據。NQ今晚分水嶺同噚日一樣喺29300，支持29200/29100/29000，阻力29400/29500/29600暫時無變，NQ一直喺呢幾百點內上落，等緊FOMC嘅議息結果。

美國聯儲局舉行議息會議前，幾間大行都向市場派定心丸，高盛、摩根士丹利及摩通均異口同聲認為，美股能夠承受潛在加息衝擊。高盛策略員Ben Snider表示，股市一般喺聯儲局開始加息時表現疲弱，但預期牛市仍會持續，並指市場已反映一年內將加息3次。大摩策略員Michael Wilson承認如果通脹衝擊大過預期，股市將面臨調整風險，但佢補充經濟前景將為關鍵；只要經濟保持增長，股市將可承受加息衝擊。而摩通亦指出，油價短期走勢主導風險偏好，9月過往多數係美股表現麻麻地嘅用份，但只要聯儲局加息步伐溫和，同時企業盈利保持強勁增長，以及通脹未有脫鈎，股市應能消化加息影響。阿Man就咁睇，今次FOMC決定加息嘅話，其實市場都預咗，只係一旦加息周期開始，初段難免引起股市震盪，但其後出現V彈嘅情況經常發生，或者因為加息帶來嘅股市調整，係一個吸納優質股嘅好機會。

能源價格攀升掀起通脹憂慮，帶動環球債息上揚，英國2年期債息急漲6個基點至4.88厘的2023年以來高位，同年期德債孳息率抽升5個基點至3.24厘。美國10年期債息升穿5厘，曾漲4.52個基點至5.0121厘，其後反覆高企。基於上周五公布嘅美國8月份通脹超出其預期，滙豐估計聯儲局本周加息0.25厘後，12月再上調利率，有別於原先估計按兵不動，該行經濟師料聯邦公開市場委員會(FOMC)最新點陣圖顯示，聯邦基金利率於2027年底中位數為4.125厘。美滙指數一度揚升0.63%至99.74，日圓大跌0.9%至155兌每美元。種種跡象顯示，今次FOMC加息機會極高。其實諗深一層，9月跟10月份股市調整嘅話，至11月中期選舉，侵侵又可以出下口術，或者派錢嚟驅動市場購買力，到時侵侵又以救市者姿態出現，所以呢兩個月美股先行調整，亦變得合情合理。

港股昨日先跌後回升，恒指低開104點，最多跌143點至24662低位後，A股收復失地，港股午後倒升120點，最高見24926，收市報24917接近全日高位，升111點，大市成交額1926億元，而北水側連續第六日碌得淨流入。雖然美股隔晚走軟，但夜期卻愈升愈有，最多較日市升近200點，收市報25028，重上二萬五水平。雖然港股跌穿多條移動平均線後，走勢明顯轉弱，但港股昨日卻未有如市場預期下探24300-24400水平尋找支持，反而跟其他亞太區股市背道而馳反彈，夜期更重返25000水平，主要係港股喺成交淡靜下，大市更易被大戶舞高弄低，尤其當25250-25450水平，近日大增熊證街貨，形成一個重磅街貨區，而成份股沽空比率已連續五個交易日，錄得20%以上沽空比率，大戶挾淡倉誘因大增，加上恒指於短短五個交易日下挫千點，及連續出現兩個下跌裂口，短線作出反彈及回補裂口亦無可厚非。

今早黑期亦升逾百點，逼近25000關，估佢唔到恒指僅高開16點，報24934已經係半日高位，一開市大市甫掉頭向下，最多倒跌139點，低見24778後喘穩，其後喺24800至24900之間爭持。恒指半日跌58點或0.23%，報24859；大市半日成交進一步萎縮至962.48億元，北水淨流入18.05億元，對維持成交暢旺亦無補於事。估佢唔到港股今早竟然未有借勢回補上周四下跌裂口25021至25161，裂口底連影都無，可能同內地公布三頭馬車數據表現一般有關。港股已跌破50日線即25250水平多日，而20日線亦將回落至25400水平之下，料此幾條移動平均線，或由前支持變為阻力，而20日線約25350-25400料阻力甚大，除非大市能重返此水平企穩，否則未能扭轉向下弱勢。

麥狄文

(徐狄怡‧證監會持牌人)