【期匯決算】Yen難突破160水平？

【Now財經台】市傳日本當局大規模入市干預，刺激日圓兌美元昨晚(30日)一度急升逾3%，升穿158水平，不過，今日(31日)又落返160.4水平，加上日本財政前景有好多不明朗因素，日圓係咪都易跌難升？

外匯策略專家張建泰指，日圓依家處於結構性貶值，日本財政狀況令人憂慮，雖然首相高市早苗話提供能源補貼，以及下調食品消費稅，但政府都要諗辦法填補財政缺口，估計到時又要發多啲債，令日債風險升溫。

Ken又話，其實日央行處於兩難局面，加息令日債風險增加，唔加息又會放任長期通脹升溫，因此，預期利差交易會令日圓持續企喺160水平，若要突破呢個位，就要留意日央行會唔會再出手干預匯市。