【期匯決算】債息中長線會走高

【Now財經台】美國聯儲局主席鮑威爾(Jerome Powell)指，下月卸任主席後，將繼續留任理事一段時間，係咪希望制衡下任主席沃什(Kevin Warsh)，令未來更難減息？美元上升，美債息亦上到4.4厘樓上，仲會有幾多上升空間？

外匯策略專家張健泰表示，鮑威爾留任理事係市場嘅重要考慮因素，首先係支持減息嘅票會少咗1張，其次係會令減息及進行改革阻力大咗，雖然鮑威爾話全力支持新主席，但佢嘅存在仍會削弱新主席嘅權威性。

債息方面，Ken就話，暫時未反映聯儲局未來1年嘅政策取向，因為有太多人事變動，中長線而言，債息應該會走高，始終唔知美伊戰事會打幾耐。雖然現在處於停火期，但協調空間唔大，霍爾木兹海峽(Strait of Hormuz)被封鎖，導致原油運輸需要更長時間先可以復常，當戰略石油儲備用得七七八八、油價喺供應緊張下又會再衝高，會對通脹造成結構性深遠影響。