【專家分析】威勝「抽水」後要捱一捱價

【Now財經台】威勝控股(03393)趁股價喺高位「抽水」，集團以先舊後新配股籌15億元，配股價30元，較昨日(21日)收市價折讓6%，威勝股價今日(21日)低開3%後，一度跌6%，低見29.9元，失守配股價，點睇威勝今次配股？

天風國際李偉傑指，市場對威勝今次集資都唔會太意外，集團規模都唔細，值得留意係，今次折讓幅度比較小，反映市場有幾大接貨意欲，今次配股亦係一口過上板。佢又話，威勝近年複合年增長都唔錯，盈利由2021年至2025年增長近4倍，市場都對公司增長給予厚望，公司提及今次集資額約34%會用喺海外市場，配合返去年海外市場增速加快嘅需要。

Jason又話，威勝不單食正人工智能(AI)供電需求熱潮，更受惠於國策規劃，國家電網喺「十五五」期間，計劃投資4萬億人仔，比「十四五」大增40%，炒起一批電網設施股，所以今次都可以有較高嘅估值去配股。

但佢補充，集團之前試過配股後，股價要沉澱一段時間先可以上返去，現時可以留意50天線水平，即28元水平，可唔可以守得住。