【全民打新】「獨角獸」希迪智駕夠賣點亦係缺點？

【Now財經台】由「大疆教父」李澤湘創立嘅「獨角獸」希迪智駕(03881)昨日(11日)開始收飛，每手10股，入場費約2657元，發行價263元，集資14.2億元，股份計劃下周五(19日)掛牌，同其他已上市嘅智駕股好唔同，公司專注於為礦山、物流及港口等封閉環境使用嘅自動駕駛卡車、車路協同(V2X)技術及智能感知解決方案嘅研發，喺港股之中算係相當獨特，係咪有吸引力？

紅蟻資本投資總監李澤銘指，呢個的確可以係一個賣點，始終依家智駕服務大部分用喺非特定場景，暫未有其他上市公司做呢類業務，加上希迪智駕嘅卡車可以互相連接，有助提升工作效率。

不過，Alan提醒，雖然應用場景獨特可以係一個賣點，但由於一般礦區使用嘅卡車數量有限，可能會限制咗公司業務增長空間，加上市場相對小，亦唔係冇其他競爭對手，長遠嚟睇，今次集資額及規模就唔算大。