【名家給力場】內地改用「大水漫灌」托市的啟示

【Now財經台】傳統智慧話股市最少行先過經濟半年，如果真係咁，港股近期大升，係咪意味可以睇好半年後內地及香港嘅經濟表現？中央今次嘅救市方案，不論時間及政策都好到位，係咪真係可以扭轉當前嘅經濟劣勢？

思博資本高級合夥人張宗永指，依家投資者唔敢Short個市，並唔係因為對經濟改觀，係因為普遍對基本面分析都冇改變，只係唔會阻止人入市。但值得留意係，A股曾經歷「黃金十年」，內地經濟規模又大，但其實股市一直表現唔好，有外國投資者認為係同政治有關。

佢又話，即使美國聯儲局減息，市場反應只係中性，而減息完全符合預期，所以唔認為救市嘅時間性好，反而值得留意係，正常係以零售銷量作為指標，同埋投資者都喺返工嘅日子炒股，所以選擇喺「十一黃金周」假期前宣布救市措施有啲奇怪。

張宗永補充，今次一改以往做法「大水漫灌」托市，反映今次要採取較極端措施係領導層嘅決定，加上事前冇任何風聲傳出，有可能係有關方面驚覺情況嚴峻，亦反映執行能力快，一話要做，人民銀行即刻連同中證監及金監總局頭就開記招宣布政策。不過，好多基金經理覺得「成也政策，敗也政策」，以前唔敢買A股，係因為政策，但依家入市，亦因為政策。