【FINTERVIEW】A股港股今輪升勢短炒味濃？(下)

【Now財經台】A股因為國慶長假期休市，市場以為喺北水「缺席」下港股會唞唞氣，但港股昨日(2日)又升過千點，成交逾4000億元，明顯資金驚錯失今輪大升市。《彭博》嘅研究顯示，美國對沖基金、新加坡及南韓嘅資產管理都有買中國股票，到底呢啲係短線資金，還是會長坐？不過，港股今朝(3日)一度瀉逾千點，擔唔擔心升勢開始轉弱？

臻享顧問董事總經理王良享認為，短炒及長線資金都有，上周二(9月24日)人民銀行及兩個部委出招後，喺美國嘅中國股票交易所買賣基金(ETF)升得特別快，當時A股仲未郁，短炒意味都好明顯。

Tommy又指，睇返好多互惠基金嘅取態，中國股票由2021年佔總部位約14.5%，跌至最新5.1%，即3年間跌咗9.4％，如果要補返足會係一個幾大嘅數字，相當於約7.1萬億美元，睇返港股及A股過去6日成交，大概補返約1.5％，短炒資金可能見近日升得多會獲利，但做長期配置仲需要一段頗長嘅時間去補返。