【專家分析】美國經濟今年陷入衰退機會微

【Now財經台】美國昨晚(27日)出爐嘅經濟數據欠佳，其中，消費開支要向下修訂，新申領失業救濟人數係2021年11月以來最多，今晚(28日)就會公布核心個人消費支出(PCE)物價指數，若升幅放緩，會唔會令美國聯儲局減息預期升溫？ 美國經濟係咪已開始步入衰退？

博威環球證券金融首席分析師聶振邦指，經濟增長同物價走勢呈正向關係，所以當經濟數據較差時，物價回落機會亦相對較大，現時聯儲局9月減息機會近60%。換言之，當數據唔理想時，反而會令減息憧憬升溫，亦會對美股有較大支持。

至於美國經濟情況，聶Sir指，一旦步入減息周期，意味貨幣政策趨向寬鬆，會對經濟帶來正面作用。佢又話，美國經濟今年陷入衰退嘅風險唔大，雖然未來一至兩年仍有相關風險，但當步入減息周期，形勢將會有變，又認為現時毋須過分憂慮。