【期匯決算】銅價有機會突破1萬美元?

【Now財經台】國際銅價近日喺高位反覆上落，倫敦金屬交易所(LME)銅價繼續迫近每噸1萬美元。

消息方面，全球銅生產力最大嘅智利下調全年銅產量至551萬噸。中國進口精鍊銅溢價跌至零，係2017年來首次，反映內地對銅需求減少。此外，英美兩國上周起禁止俄羅斯金屬喺LME同芝加哥商業交易所(CME)買賣。

環球期貨交易所客席講師鍾俊鏘認為，除咗上述因素，近日全球多地銅礦生產受阻亦令銅價短期將繼續大幅波動。當中，非洲贊比亞(Zambia)因乾旱導致水力發電量驟降而影響銅礦運作；巴西礦企淡水河谷(Vale)位於該國索塞古(Sossêgo)嘅銅礦停產。

Joe續指，銅價最近一輪抽升後已消化利好消息，技術上亦滿足量度升幅，衝上至近9800美元水平，料短期較大機會於高位盤整上落，支持位約9500至9600美元，阻力位1萬美元。