【名家給力場】二手樓trade in救到內房？

【Now財經台】內房市場冇咩起色，近日鄭州市就出新招賣樓，提出二手樓「賣舊買新、以舊換新」，全年目標5000套，由國資企業負責收購樓齡20年以內嘅二手房，為市民提供保障性租賃住房。其後，無錫梁溪、江蘇海安等二、三線城市亦推出類似措施。

不過，廣東省地產商會副會長尹德輝認為措施作用不大，指內地二手樓仍然有價有市，政府開價未必滿足到業主升值期望，最終未必成功達標，而如果政府收購價太貴，就可能行本港市區重建局舊路，因為「高買低賣」而為政府帶來虧損。

與此同時，據內媒《財新》報道，中央考慮建立全國性房地產平台公司，負責收購爛尾樓，收購後將住房打造為保障性住房出租或出售。

尹德輝對消息不感意外，指中央政府包底可以向外資證明，當局會出手令樓市循環重新運行。佢話如果消息屬實，相信會係中央收拾內房殘局嘅終極方案。