【專家分析】台積電睇淡行業增長前景有咩啟示？

【Now財經台】美股3大指數昨晚(18日)個別發展，其中，納指已連跌5日，但台積電(TSMC)昨日(18日)出完季績後，都幫到英偉達(Nvidia)股價靠穩，值得留意係，台積電進一步睇淡行業增長前景，又預期集團第2季收入增長唔及第1季，對行業有咩啟示？此外，喺美股噚晚收市後出業績嘅Netflix，交咗一份亮麗成績表，每股盈利超預期，但集團公布2025年首季開始，唔再公布季度會員數目，會唔會對股價有影響？

博威環球證券金融首席分析師聶振邦指，受人工智能(AI)發展帶動，今年晶片需求理應有增無減，但台積電第2季預測保守，或反映AI發展冇想像中咁強勁，有機會對整體美股帶嚟挑戰。

聶Sir又話，Netflix透明度減少不利市場氣氛，但會增加公司營運彈性，因為唔需要投入咁多資源向公眾交代數據，有助控制成本，佢認為唔需要太擔心，始終集團業績增長亮麗，預期股價暫時會喺600美元至640美元上落。