【FINTERVIEW】終極加息後1年揸股債好過Cash(下)

【Now財經台】踏入4月及第2季，投資市場由Risk off情緒主導，風險胃納亦降低咗，依家市場最大風險因素係乜嘢？環球股市短期係咪有機會見頂？此外，瑞銀(UBS)估計，美國明年可能掉頭加息，因為經濟有可能「冇著陸」(No landing)，如果美息真係higher for longer，係咪會衝擊全球股市？

摩根資產管理環球市場策略師周奐彤指，美國3月通脹超預期，加上昨晚(16日)聯儲局主席鮑威爾(Jerome Powell)又再「放鷹」，話通脹數據顯示美息會持續高企一段更長時間，令息口路徑及通脹前景唔明朗，加上中東局勢持續緊張，令整體投資市場呈Risk off氣氛，不過，佢估計，美國通脹未來會持續回落至2.5%至2.8%，並預期聯儲局會喺9月或12月減息。

Marcella認為，美國下一步係減息而唔係加息，雖然通脹靭性比想像中強，但始絡都係一個放緩趨勢，唔可以忽略呢點，「軟著陸」(Soft landing)同No landing嘅分別係，前者係見到通脹有回落跡象，後者係通脹續於高位徘徊，市場依家price in「冇著陸」，認為通脹唔會回落至2%水平，但據佢觀察，仍喺高位徘徊嘅住房(shelter)、保險(insurance)及租金確實有回落跡象。

佢又指，睇返過往嘅周期，喺最後一次加息後12個月，持有股債表現係好過揸現金、定期好。