【專家分析】領展股價見7年低兩大「死因」

【Now財經台】美國今季減息機會進一步降溫，對本地地產股嚟講肯定係壞消息，對於孭重債嘅相關股份更加係災難，新世界發展(00017)股價今日(11日)明顯跑輸同業，領展房產基金(00823)亦跌至逾7年低位，新世界孭重債拖累股價唔難理解，但點解領展都跌到咁？

艾德金融聯席董事陳政深指，對領展股價跌唔會感到意外，首先喺高息環境下，地產股融資成本持續高企，領展供股已引起投資者不滿，供完股之後股價表現又麻麻，包括分析員及評論都覺得領展作為房地產信託基金，供股係同投資者預期有落差。

其次係領展旗下物業唔止屋邨商場，仲包括九龍東商廈、澳洲及內地商場等，不過，依家整體租務及零售市道差，市場都關注集團有冇能力保持可分派收入持續增加，若可分派收入持續減少，即使分派比例再高，基金單位持有人嘅收益都會減少，所以股價下跌係有跡可尋，現時7厘息只係屬於中性水平，而上述提及嘅因素都未出現向好跡象。