【期匯決算】金價今季有機升穿2500美元

【Now財經台】金價今日又破頂，一度升至每盎司2356美元，金價2月中至今已累升17%，依家14天相對強弱指數(RSI)已升至80嘅極度超買水平，短線調整壓力大唔大？中長線可升至咩水平？

信誠證券及期貨投資服務部董事蕭猷華指，金價今季有機會升穿2500美元，整體基本因素短期都唔會改變，而美國通脹會繼續撐起金價，雖然美國減息預期降溫，但相信聯儲局今年仍會減息。

Tony又話，市場擔心下半年會發生「黑天鵝」事件，由於今年係美國大選年，市場憂慮會出現政治亂局，加上美國債務問題等因素都會為金價帶嚟支持，佢估計，金價14天RSI有機會升至90，目標價暫時先睇2400美元，一旦升穿，就可以上望2500美元。