【名家給力場】黃遠輝:貨尾單位有望3年內消化晒

【Now財經台】截至去年底止，本港一手住宅已落成貨尾單位有2.3萬伙，係逾20年最多，加上今年新推項目估計涉及2.8萬伙，令總供應達5.1萬伙。有分析認為，基於本港樓市短期內仍處於去庫存局面，預期發展商會維持「量先於價」嘅策略，即使成交量回升，恐怕亦需時幾年先可以充分消化。

房委會資助房屋小組前主席黃遠輝認同，本地樓市喺未來一段時間會處於「量升價不升」嘅狀態。佢解釋指，雖然過去幾年成交量大幅萎縮，但有好多滯後嘅剛性需求一直被壓抑，如果樓價繼續平穩發展，而美國聯儲局下半年開始減息，相信會有更多買家因息口向下而積極入市，並估計約3年就可以消化晒貨尾單位。

黃遠輝又認為，即使美國年中開始減息，本港樓價都唔會顯著回升。佢指出，香港跟外圍加息嘅步伐相當緩慢，最優惠利率(P)由5厘起步上調，但現時仍低過6厘，而一般以約3.75厘嘅息率已承造到按揭。