【名家給力場】內房政策救到樓市？

【Now財經台】仲有兩個交易日就係3月嘅月結及季結，「兩會」或其他經濟重點政策會議都已經召開，但內房銷售數據繼續尋底，反映內房爆煲後，即使中央不斷出手都救唔到樓市，究竟要捱幾耐先會見到曙光？

廣東省地產商會副會長尹德輝指，雖然樓價唔係「跳崖式」下跌，喺中央角度亦唔算差，但內房股呢十幾年係逐步上升，如果突然唔郁，甚至跌，就會好難受，所以喺中央角度，樓市係幾好，起碼唔使畀人投訴話有樓王、地王，同買唔起樓冇屋住，後生仔上樓易咗，因此，以依家嘅內房政策，只需等經濟好轉就自然百業興旺。

至於最近市場流傳房地產取消核心城市限購政策，以及推動融資協調機制落地，尹德輝就話，咁樣先係對症下藥，以前中央唔肯鬆綁北京、上海、廣州、深圳樓市，但依家都肯鬆手，仲放寬埋其他一線城市如中山、佛山，前者可以令呢啲核心城市冇被浪費，後者令融資方面可以暢順啲，好似「白名單」，中央係直接叫有關機構畀錢有困難嘅項目，有系統性撥款，就唔驚公司會挪用，又可以將社會穩定。