【息賺】「撤辣」後樓市加快出清

【Now財經台】上周三(2月28日)公布嘅《財政預算案》終於宣布樓市全面「撤辣」，刺激一、二手樓交投喺剛過去嘅周末顯著回升。不過，本地地產股股價冇乜反應之餘，部分更要倒跌，其中，新世界發展(00017)一度挫5%，反而地產代理股美聯集團(01200)當炒，股價飆逾30%。

香港大學房地產及建設系客席副教授楊書健認為，美聯率先炒起係因為「撤辣」後，最快顯現嘅效果係成交量增加，對地產仲介有利。佢分析指，「撤辣」除咗會釋放一部份潛在需求，亦會釋放潛在供應，並指身邊有移咗民嘅朋友本來封盤唔賣，政府宣布「撤辣」後，隨即要求地產經紀放盤。

Victor續指，去年長實集團(01113)率先減價賣樓後，樓市開始咗覓價過程，相信未來隨著成交量回升，樓市將會更快調整至出清價格(clearing price)，即係投資者樂意成交嘅價格水平。佢希望今次「撤辣」可進一步睇到新巿價，業主及買家就更易部署買賣策略。