【名家給力場】人行減息步伐要加快

【Now財經台】內地連續4個月通縮，1月居民消費價格指數(CPI)按年跌幅擴大至0.8%，錄得2009年9月以來最大跌幅。

早前，《彭博》引述內地網上招聘平台智聯招聘嘅調查顯示，愈來愈多內地僱主唔願意加人工，約32%受訪白領話去年人工少咗，比例係2018年以來最高，呢個趨勢有可能令通縮期延長。

資深銀行家劉卓衡表示，息口需要更快回落，防止通縮持續惡化，否則，市場會預期物價持續下跌，因而選擇延後消費。佢又認為，人民銀行最近將5年期貸款報價利率(LPR)大幅下調25個基點至3.95厘，係行咗好嘅一步，但未來仍需要更進取地減息。

劉卓衡續指，唔希望見到內地出現類似上世紀90年代，日本開始出現通縮嘅惡性循環，但內地嘅情況較為樂觀，因為仍有唔少空間減息，好過日本當年房地產泡沫爆破時，利率已降至極低水平。