【專家分析】中車、時代電氣接到大單都谷唔起股價

【Now財經台】港股繼續靠「中特估」概念股撐住，鐵路設備股都有得升，因為中國鐵路集團公布咗今年第1批招標定單，係疫後首次恢復動車組大規模採購，中國中車(01766)及時代電氣(03898)都會受惠，摩根士丹利估計，呢批200億人仔定單可貢獻兩家公司去年收入約70%，因此，看好兩隻股份股價喺未來15日有80%機會向上，但兩隻股份午後齊齊倒跌，就算有「摩笛」唱好都似乎幫助唔大？

英皇資本財富管理方案研究總監陳錦興指，暫時嚟講的確意義唔大，市場對中車合約增加嘅憧憬其實已經有一段時間，所以股價先有得升，當然，呢批合約都重要，但要有更加強嘅刺激，股價先有突破動力。

佢又話，今次未見有令市場好意外嘅消息，因此，投資者唔會特別追入去，只係跟住個市炒，而兩隻股份今日都喺高位遇阻，加上A股都要跌，所以午後跟隨大市回落都唔會覺得意外。