【環球金融快線】拆解息魔點引爆美銀行危機？

【Now財經台】歐美銀行風暴由美國矽谷銀行(SVB)倒閉揭開序幕，其後引發數家美國中小銀行連環爆煲，風暴更蔓延至歐洲，令擁有逾百年歷史、捱過2008年金融海嘯嘅瑞信(Credit Suisse)倒下，由對手瑞銀(UBS)收購，銀行業危機似乎終於平息。目前，聯儲局6月加息意向仍未明朗，美國前財長薩默斯又話，預期聯儲局需繼續加息，而加息被指係今次銀行風暴嘅元兇，若美國未加完息，會唔會出現一波銀行危機？

資深經濟師羅家聰指，銀行其中一個賺錢方法係靠長短息差，如果加息加得急，短息會高過長息，長時間倒掛令銀行難賺錢，加上企業見到息口不斷上升，擔心貸款後無力償還，令銀行冇生意。

KC又話，銀行嘅問題唔單止擠提、流動性等個別營運問題，而係系統性問題，即使美國依家唔再加息，維持息口喺5厘水平，都已經令好多企業唔借錢，影響銀行營運，存在系統性風險。