【專家分析】地產股不宜睇得太樂觀

【Now財經台】內地疫情持續降溫，下晝更宣布「新十條」，進一步優化防疫措施，如果內地進一步部署通關，本地地產股可唔可以好似上次本港放寬防疫措施至「0+3」時，有一輪炒作？事實上，大行近期都開始轉風向，唱好本地地產股，其中摩根士丹利指，本港樓價或明年初見底，全年更可以彈高。本地地產股有冇機會喺通關及樓價見底前半年，提早反映呢啲利好因素？

英皇證券研究部總監陳錦興指，股市一定係提早反映，畢竟市場流動性高，之前困擾港股嘅因素都出現一啲變化，例如息口因素，包括利率有機會明年上半年見頂，一定對本地地產股有幫助，通關更加係市場期待已久，因為經濟復甦會更理想，都會利好樓市氣氛，所以對市場依家做相關部署都唔意外，但內地復常過程難免有啲反覆，例如疫情再反彈，而利率仍有機會維持喺高位一段時間，對地產股嘅幫助未必有想像中咁大，所以唔適宜太樂觀。