【股市脈搏】國慶黃金周冇北水港股凶多吉少？

【Now財經台】大市氣氛進一步轉差，恒生指數、國企指數、科技指數今日收市齊挫逾3%。

3大指數中，以科指跌幅最大，跌至逾半年低位，收市險守3500點，但仲未跌穿3月大跌市低位，不過，國指已跌穿3月低位，創近14年新低，即2008年底金融海嘯以來低位，恒指就創近11年新低。

內地將迎來國慶黃金周長假，聽日(28日)開始北水就會暫停至10月10日先重開，即係未來6個交易日都冇北水，面對咁疲弱嘅市況，相信資金都會先行沽貨離場，令大市今日沽壓加劇。

恒指最新14天相對強弱指數(RSI)已落到22嘅超賣水平，加埋今日恐慌式急挫，聽日期指結算又冇北水，成交轉淡下，指數較易舞高弄低，雖然港股短線有機會反彈，但同恒指關連性高嘅人仔跌勢加劇，港股中長線走勢都好難樂觀。