【FINTERVIEW】中國靠數字經濟食糊？

【Now財經台】據《路透》報道，中國政協今日會舉行推動數字經濟持續健康發展專題協商會，受消息帶動，港股今朝開市即重上20000點，科網股亦強勢，其實3月中以嚟，不論國務院會議、政治局會議、中證監及人民銀行，喺針對科網企業嘅監管問題上，都似乎「鬆咗口」。

滙豐環球私人銀行及財富管理亞洲區首席投資總監范卓雲指，預期針對科網企業嘅監管應逐步紓緩，原因係國務院副總理劉鶴喺3月中率先提及，平台經濟嘅監管措施應趨向透明，政治局會議亦提及，平台經濟亦應平穏發展，而反壟斷、保護消費者訊息等監管周期，都已經進入相對成熟嘅階段。

對於內地最新失業率升至6.1%，范卓雲指，國務院總理李克強召開保就業會議時亦強調，必須採取措施穏住就業市場，而平台經濟係過去5至10年增長最勁嘅行業，招聘人數亦係最多，基於現時中國經濟面對嘅挑戰，所以未來數字經濟發展嘅政策取向應會更正面。