【專家分析】現價買滙控「食」7厘息

【Now財經台】滙豐控股(00005)中午出咗業績，第3季盈利按年大升近1.4倍至77.1億美元，但按季跌12%，遜預期。滙控股價今朝輕微低開後，跌幅擴大，其後一度倒升，但公布業績後再度轉弱，收市報57.2元，跌逾1%。

滙控又話，今、明兩年派息比率目標為50%，博威環球證券金融首席分析師聶振邦指出，集團第3次股息每股派10美仙，雖然同過往相若，但如果以期內每股盈利(EPS)29美仙計，今次只係派咗盈利三分之一，認為市場或對派息幅度感失望，而令股價繼續受壓。

聶Sir續指，港股表現麻麻，滙控作為恒生指數5大權重股之一，本來就難靠大市氣氛帶動股價，如今自身業績欠缺驚喜，加上出售法國零售銀行業務相關嘅減值會影響今季盈利，即使集團將進一步回購最多30億美元股份，現時對股價提振作用不大。

聶Sir唔建議做短線部署，並預期未來1個月滙控股價會喺60元水平遇到較大阻力，要跌至55元至56元先有支持，不過，滙控現時股息率有7厘，想部署中長線可以考慮趁現價吸納。