【環球金融快線】外資進駐内地市場「水土不服」?

【Now財經台】中國加入世界貿易組織後，逐步對外開放内地金融市場，喺中美貿易戰後外國公司被允許喺内地經營自己嘅全資公司。貝萊德作為首家喺中國全資運營嘅外資資產管理公司，喺呢個最有機會嘅市場似乎得唔到發展機會，數據顯示佢喺中國管理資產規模排名僅排第145位。可以點樣理解呢個現象？外資金融機構喺内地係咪「水土不服」?

馬山資本董事總經理林子傑認為，主要原因係時不予我，如果貝萊德係特朗普上台前就有全資資格喺中國發展業務，相信許多大型金融機構或科技機構會想合作。但貿易戰開始後，呢類公司就左右不是人，一方面有政治壓力，另一方面，內地機構未必願意同貝萊德進行緊密合作。此外，中國樓市同經濟形勢麻麻，大家會想要現金因而減少投資。