【環球金融快線】韓台股市食正AI熱

【Now財經台】A股及港股近期弱勢，外國資金湧向其他亞洲區股市，除咗近日走出「迷失30年」嘅日股，台灣、南韓及印度股市亦唔聲唔聲咁起動，而日、韓、台股市今年已累積雙位數升幅。

馬山資本董事總經理林子傑指，投資亞太區市場注重增長，日股嘅賣點係估值平，加上有「股神」巴菲特唱好，而印度就係炒人口紅利，以及當地通脹較預期低嘅經濟復甦概念。

Kevin續指，南韓及台灣股市食正人工智能(AI)熱潮，唔少AI相關股係硬件或晶片製造商，較一啲熱炒軟件開發商穩健。佢相信AI概念仲會炒一段時間，並睇好南韓同台灣股市能夠喺下半年繼續大放異彩。