【環球金融快線】馬斯克買Twitter「鬧劇」又有變數？

【Now財經台】Tesla創辦人馬斯克「反口」重啟收購社交平台Twitter交易，據《紐約時報》報道，馬斯克要求7折收購Twitter，意味公司估值由天價440億美元，「劈價」逾百億美元至約310億美元，最終畀Twitter一口拒絕。市場一直質疑馬斯克收購Twitter嘅資金來源，依家《紐時》爆咗呢單消息，加上傳出原本有意提供融資嘅2家私募基金退出協商，呢單交易最終會唔會成事？

馬山資本董事總經理林子傑指，有分析認為馬斯克其實唔係想完成收購，只係想拖延時間，用資金不足為理由賠錢了事。佢又話，馬斯克早前同摩根士丹利等7家大行傾掂數，進行約130億美元融資用嚟收購Twitter，呢份協議會喺月底到期，馬斯克曾經同Twitter協商，如果最終籌唔到足夠資金收購，佢可以畀10億美元「分手費」終止收購。