【槓桿致勝】友邦CALL選擇少可以再等等

【Now財經台】友邦保險(01299)出完業績後，股價暫時連跌第6個交易日，今早(15日)再挫逾3%，低見46.95元，跌至7年低位，今朝較受歡迎嘅產品，槓桿約8倍至10倍，若投資者想部署友邦反彈，可以揀邊類條款？

法國巴黎銀行上市衍生產品部林恩指，友邦出完業績後，持續弱勢，雖然香港及內地新業務價值錄得增長，但利潤率有下滑跡象，新回購計劃亦暫時令人失望，加上有關內地營運嘅傳言令投資者負面情緒加劇，友邦股價今年已累跌近30%，今朝都有投資者部署好倉，較受歡迎嘅牛證收回價介乎44元至46元。

Lynn又話，友邦股價今朝跌穿47元，暫時難以估底，若投資者想撈底，依家價外30%嘅CALL輪冇乜選擇，但可以考慮相對貼價介乎64元至70元，9月至10月到期，槓桿8至9倍，又或者等友邦股價開始反彈再做部署。