【槓桿致勝】CALL小米避收回風險

【Now財經台】有大行唱好小米集團(01810)，指小米汽車熱賣有助提升估值，屬行業首選，小米今早(12日)成交活躍嘅CALL，8月至12月到期，行使價17元至19元，槓桿4至5倍，活躍嘅牛證距離收回價約10%，槓桿做到4至7倍，兩者槓桿差唔多，投資者應該點揀？

法興銀行證券上市產品銷售部董事周翰宏指，小米近期波幅較大，尤其係上周出現裂口，若當時揀貼價牛證可能已被收回，但近日股價又彈高，因此，好似小米呢類波動性較大嘅股份，買CALL輪就可以避開收回風險，槓桿兩者都差唔多，進取啲嘅小米牛證收回價約15元，槓桿有7倍，而較價外嘅CALL槓桿都有5倍以上，短身嘅CALL都做到6倍槓桿，因此，揀CALL可以避開收回風險之餘，做到差唔多嘅槓桿。

Horace又指，小米市場上普遍CALL輪延伸波幅係40%至43%，以小米最近嘅波幅嚟講唔算偏貴，但留意若延伸波幅達46%就要避開，要揀40%至43%延伸波幅之間嘅定價，行使價17元至19元，睇好小米嘅投資者可以揀價外10%至15%嘅CALL，行使價約18至19元嘅條款。