【槓桿致勝】睇淡美股點部署期權？

【Now財經台】美國有銀行爆煲後，市場憧憬聯儲局會暫停加息，但最新又爆出瑞信危機，美股3大指數噚晩又跌。近期股市走勢反覆，如果睇淡後市，但用期貨做部署又怕畀個市夾住，可唔可以用其他工具，例如期權做部署？

香港程式交易研究中心總裁蔡嘉民指，期權嘅好處係可以選擇用唔同嘅組合出擊，做部署前，要先睇VIX指數，美國先後有銀行爆煲，瑞信危機又殺埋身，但VIX未見升至好高水平，暫時喺26水平，即歷史平均值水平。

佢又話，做期權部署，睇淡可以做SHORT CALL或LONG PUT，值得留意係，雖然LONG PUT更吸引，但成本都幾高，如果做咗LONG PUT，但大市冇跌到目標水平或行使價樓下，時間損耗太耐，可以考慮期權組合，用Debit Put Spread，主體仍然係LONG PUT，喺較低行使價加隻SHORT PUT落去，收返期權金幫補LONG PUT成本，但要留意利潤有機會被SHORT PUT封頂。