【期匯決算】金價回調吸納睇2260美元

【Now財經台】金價第2日顯著向下，現貨金喺亞洲時段一度失守每盎司2300美元。之前推高金價主要喺地緣局勢緊張，以及對美國減息嘅預期。不過，伊朗近日淡化以色列嘅襲擊避免局勢升級，聯儲局官員都進入靜默期，言論普遍認為當局唔急於加息。避險需求降低加上利率較長時間維持高位，配合咗金價調整。而家現貨金回調幅度逾5%，短線係咪已經見頂？回調又係咪吸納機會？

信誠證券及期貨投資服務部董事蕭猷華認為回調係吸納機會，重點係會去到幾多。金價大方向都係睇向上，目前係調整期，可以見到高位短期見頂後出現調整，相信之後會繼續向上。雖然伊朗與以色列衝突暫緩，但仲有其他戰事，而且美國減息機會仍然係大，如果憧憬仍高，金價理論上唔會調整太多。

至於調整可以睇咩位，Tony話3月中時平台位開始拉升到約2150美元水平，高位大概2430至2440美元水平，因為0.5支持位已經跌穿咗，0.618就係約2260美元水平，亦4月初係一個比較大嘅支持位，所以係呢個水平可以考慮部署或重新吸納，中線第2季仍然睇2500美元水平。