【輪證下半Part】買恒牛定德國？

【now.com財經】今朝揀咗隻恒指熊(61455)出嚟，博指數如果喺五分鐘圖真係行「長方形」出嚟嘅話，就等指數上返「長方形」頂線，或者Slow STC(14,3)上返去超買時先至再出場。以今朝篇文喺Patreon出場時間為10點50分，on top 再比多10分鐘時間睇文的話，就剛好係11點正，睇返恒指呢個位喺五分鐘圖上見指數仲向住「長方形」頂線出發，不過，再過多五分鐘之後指數出爭兩點嘅「平頂」後再落，偷得呢個位出(61455)唔反對，但真係要動作快，見之前指數喺個「長方形」裡面上落嘅速度就知佢咩料。

以11點至11點5分見指數高出爭兩點「平頂」而偷位出(61455)的話，期內高低位做過0.036元/0.033元計，平均買入價為0.0345元。落場後指數沿返「長方形」嘅Swing向下擺落，去到11點35分，見到指數已經同11點30分嗰支燭嘅低位只係爭三點，拉到盡嘅爭三點「平底」出現，同樣地指數都係未掂到「長方形」底線就作勢要回，喺一頂低於一頂，同一底高於一底嘅情況同步出現之下，「長方形」極大可能會變成「楔形」，甚至「三角形」，換言之要預返指數有上行嘅可能之下，(61455)即閃，以喺11點35分見爭三點「平底」後即走，期內高低位做過0.041元/0.036元計，平均走佬價為0.0385元，一計之下好彩今朝揀嘅(61455)係市場上最高槓桿嘅熊證，如果唔係點會喺半個鐘頭左右平均爬到四格或11.59%。

作戰室今日嘅玩法都係做快閃黨為主，不過唔係出淡倉，反而係出好倉，無他嘅，純綷喺「長方形」裡面捉嘅上落擺動先後嘅問題，但喺11點50分指數忽然抽高升過百點呢一下就真係估唔到嘅，只係保歷加通道口未有見到再拓闊嘅情況之下，好倉四散過後等放飯。

Lunch Time完結，下半場再開市時見指數喺五分鐘圖上稍稍回落返去50分鐘線(五分鐘圖10線)，依家1點26分，恒指做緊17,548點，升124點，作戰室下午第一注好倉已經出動，博嘅係指數可以踩住50分鐘線而再次向上。留意返，恒指呢口價已經由今朝近牛證街貨層，變返近熊證街貨層(以今日牛熊街貨中間價17,499.5點嚟做界線)。

五分鐘圖上見指數沿得到50分鐘線上行而反手出恒指牛(60880)唔反對，收回價17150點，同現價有約400點差距，槓桿約33.02倍咁先夠做到Day Trade，依家1點33分，五分鐘圖上行咗「圓底」，頸線未破，再落返去50分鐘線。原本依家整條保歷加通道上行中嚟講，係應該向下靠中軸比較合理，不如就用返中軸做界線，萬一「圓底」頸線不破後回落中軸見支持，咁先至偷位入(60880)啦。

如果偷唔到位嘅，(60880)可以放埋一邊，小注試下買今晚德國勝，因為戰友見到某討論區連燈咗兩場波，佢今日出Post話日本近6仗有83%不敗紀碌，買佢對家應該無死。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

作戰室入口：https://www.patreon.com/cbbcwar

專頁：https://bit.ly/3uixP4Y