【輪證下半Part】週線「破腳穿頭」八成確認

【now.com財經】今朝都講明今日係觀戰，目的只係想等週線圖收定，確認一下係咪真係出到「破腳穿頭」同Slow STC(14,3)觸底。作戰室就喺開市無幾耐就出咗一注淡倉到上半場完場，中間係有位可以爬到格仔，但說實話爬得唔多；由今朝成朝指數喺五分鐘圖上只係行出「長方形」出嚟，呢個「長方形」真係夠長，長到捱過保歷加通道由拓闊變下行再變收窄，再到停止收窄，呢個「長方形」仍然屹立不倒。

中場休息餵完我家肥貓同自己食飯之後，抖一陣又到下半場開市，Reload個走勢圖之後見到指數有向下坐低咗廿幾點，進一步踩住「長方形」條底線，再等多五分鐘，終於見到保歷加通道口有較明顯嘅拓闊走勢；換個小時圖見指數剛好踩住保歷加通道中軸，亦都係今朝喺作戰室有提過嘅出淡倉目標水平，今朝一早喺作戰室出嘅淡倉走貨在望，如果唔係又要捱多次個「長方形」。

依家1點10分，雖然指數跌幅略為擴大，但係週線圖上仍然見到本週高位(18164點)仍然高於上週高位(18,077點)，同時本週嘅低位(16,906點)都係低過上週嘅低位(17,016點)，換言之今個星期粒燭仍然包住上個星期嗰粒。下半場依家先至啱啱開始，隨時最後嗰一個鐘抽高返上去，令到今個星期嘅收市價高於上個星期嘅開市價(17781點)，咁呢個「破腳穿頭」嘅形態就真係靚過教科書啦。

五分鐘圖見保歷加通道口確認拓闊，終於都下破到「長方形」底線，睇嚟作戰室隻淡倉可以收網，少少地食咗佢算，今餐當減肥。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

作戰室入口：https://www.patreon.com/cbbcwar

專頁：https://bit.ly/3uixP4Y