【FINTERVIEW】點解港股5月獨憔悴？

【Now財經台】計埋今日，港股喺「五窮月」只剩返兩個交易日，截至噚日止，恒指今個月暫累跌逾1300點，而3大指數開關重啟嘅升幅全部化灰，反觀外圍，美股、日股、韓股走勢強勁，同港股表現差天共地，點解會出現「港股獨憔悴」嘅情況？係咪受A股及內地因素影響？

東亞銀行財富管理處投資策略師陳偉聰指，港股年初其實因憧憬美國加息周期結束升咗一輪，但近期美國公布嘅數據仍然偏強，令市場認為聯儲局6月加息嘅機會又大咗，而當債息上升時，的確令港股面對唔少壓力，見到科技股及高息股都跌咗落嚟。

Jason又話，內地4月經濟數據大部分都差過預期，同市場預期有好明顯落差，令市場對內地經濟重啟、復甦動力，喺第2季係咪可以持續存疑，再加上其他因素，導致外資沽A股，再加上中美一啲衝突，令港股整體估值都受到一啲壓力。