【FINTERVIEW】本港樓市年底閃崩？

【Now財經台】本港樓價今年突然急轉直下，更加有分析警告，樓價會自高位閃崩50%，外資大行亦排隊唱淡本港樓市，其中高盛最新下調本港樓價預測，由原先預期2022至2024年住宅樓價跌約20%，下調至預期2022及2023年樓價分別跌15%，即累跌30%。

不過，Bricks & Mortar Management主席王震宇認為，現時本港樓市抗跌力相比過往多次金融危機時要高，因為政府過往已推出唔少辣招防止樓價過熱，加上整體借貸水平偏低，睇返金融管理局數據，現時首期成數一般約30%。佢估計，反映二手樓價嘅中原城市領先指數(CCL)今年底會跌至160水平，如果明年中未打仗，或會慢慢落返150邊緣喘定，而最差情況會跌至120水平，即係仲有約20%下跌空間。

Eric又稱，現時樓市主要係受美國大幅加息影響而陷入陣痛期，但長線睇美國咁進取加息，好可能令債市爆煲，尤其係主權債券，資金最終會回流樓市，買返實質資產避險。