【now.com財經】今年7月熱到爆，高溫警報席捲多國。呢股熱浪對我哋日常生活造成連鎖效應，觸發「熱通脹」(Heatflation)，物價越嚟越貴。例如歐洲受到熱浪同乾旱夾擊，法國、意大利嘅小麥、大米、粟米都失收，產量少咗價格自然飆升。而農作物收成差，連帶動物飼料同樣墜入量跌價升嘅循環，養豬牛雞成本增加咗，又令肉類食品價格暴漲。
除咗糧食，熱浪亦令用水用電嘅需求急增，能源開支都避唔開「熱通脹」，所以歐美國家紛紛出招，大力鼓勵市民慳水慳電。奇招層出不窮，西班牙要求室內冷氣溫度唔可以低過攝氏27度、德國嘅公共游泳池同體育中心唔再提供熱水沖涼、意大利更推出「限洗髮令」禁止髮廊幫客人洗兩次頭等等。
香港今年7月打破咗多個高溫紀錄，係香港有史以嚟最熱嘅7月份。天氣熱開冷氣係常識，等我分享個慳電貼士畀大家。話說前排屋企裝修，我換咗屋企嘅冷氣機，發現新舊冷氣機同樣係一級能源標籤，但換咗新機後，雖然使用量差不多，電費竟然平咗成半！
其實冷氣機嘅壽命同效能都係有限期，用得太耐就要考慮吓換部新機。雖然要俾錢買新機，但每個月慳返唔少電費，新機又會靜啲涼啲，條數有得計吓喎。未夠期換機都要定期搵師傅檢查同維修保養部冷氣，咁先可以幫部冷氣機保持最Fit狀態，慳電之餘又可以對抗氣候變化。
鍾練仁
