【now.com財經】天時暑熱，最正一定係食凍嘢。好多家庭喺夏天會雪定好多汽水、生果同雪糕等等，唔覺意就塞爆個雪櫃。其實雪櫃放得太多嘢，唔止會影響冷凍效能，仲會用多咗電。
一般家用雪櫃嘅出風口喺冷藏室嘅中央位置，冷風喺雪櫃內循環流動，保持低溫冷藏食物。好多時雪櫃唔夠凍，係因為我哋放得太多嘢，擋住個出風口，阻礙冷風流通，令雪櫃入面嘅溫度唔能夠平均分佈，近出風口嘅食物就雪到結冰，而近雪櫃門嘅食物就唔夠凍。
當我哋覺得雪櫃唔夠凍，好自然就會調低溫度。其實咁樣唔止容易雪壞食物，雪櫃嘅壓縮器會不停運轉製冷，變相會用多咗電，所以雪櫃最好只放七至八成滿，要留番足夠嘅空間畀冷風流通，咁先至發揮到最佳嘅冷凍效果。
仲有呀，成日開雪櫃攞嘢，冷風好容易流失，雪櫃感應唔夠凍就開始製冷，自然要用多啲電。雪櫃嘅擺位都有學問，避免被陽光直射或者近煮食爐、唔好喺雪櫃頂放好多嘢，四周要留空間散熱、放入雪櫃嘅食物要先攤凍，否則雪櫃要用多啲電去製冷散熱降溫，耗電量有機會增加大約5%至15%。
要慳電當然唔少得揀有一級能源標籤嘅雪櫃，能源效益最高。買之前問清楚雪櫃嘅冷凍效率同隔熱能力表現，因為冷凍效率越高，雪櫃嘅冷凍速度就越快；雪櫃嘅隔熱能力越強，就唔洗用咁多電去製冷散熱，同樣有助慳電節能。
宜家市面上嘅新款雪櫃，有啲設有省電模式(Eco)或者假期模式(Vacation mode)，如果你會長時間唔開雪櫃門，呢啲模式就會將雪櫃冷藏室嘅溫度設定自動提高，減低用電量。 另外做好定期保養，例如定期清理雪櫃入面嘅嘢、幫機背嘅散熱裝置清潔除塵，令散熱功能保持正常運作，都可以有助慳電。
雪櫃係全年無休嘅家電，我地一定要對「佢」好啲，用得Smart啲。
鍾練仁
