【名家給力場】美經濟仍未脫險

【Now財經台】國際貨幣基金組織(IMF) 年初指，今年有三分之一經濟體會陷入衰退，但依家睇法較為樂觀，最新更上調今年全球經濟增長預測至2.9%，係1年以嚟首次，但仍低過舊年嘅3.4%，美國最近公布嘅經濟數據，係咪比到外界信心？美國經濟軟著陸機會大唔大？

資深經濟師羅家聰指，雖然IMF調高全球經濟增長預測，但仍然低過3%，其實已等同經濟衰退，IMF調高增長預測係因為好多先進體系嘅就業、消費數據冇大問題，但其實唔少領先指標都轉差，例如樓市數據，加上息口持續高企，唔少大行都估計經濟要到下半年先會衰退。

KC又話，暫時睇唔到美國經濟有咩危機，但唔代表之後唔會出問題，根據過往經驗，依家嘅加息走勢及美元偏強，一旦出事，新興市場會首當其衝，現階段斷言美國經濟唔會出事係過分樂觀。