【環球金融快線】買歐債暫時唔好諗

【Now財經台】法國10年期國債孳息昨晚(19日)一度再升至4.87厘高位，與德國息差已拉濶至143點子，亦高意大利債息32點子。拉長嚟睇，法國國債孳息已升穿金融海嘯時高位，再加政府財赤，以及國債佔國內生產總值(GDP)水平，疫後一直壓唔到落去，法國債息係咪已升危險水平？

iFast Global Markets副總裁溫鋼城表示，現時法國動亂十分激烈，唔少名店被「零元購」，經濟環境一定係唔理想，而總統馬克龍(Emmanuel Macron)可唔可以繼續執政都有變數，喺呢個環境下，「債息升、股市跌」係好正常，至於呢個局面可唔可以扭轉，就要視乎油價，如果中東局勢好轉都會幫到手。

佢又認為，債息未來有機會升穿5厘，因為歐洲央行表明之後會加息，對法國呢類赤字佔GDP比例較高嘅國家，加息會帶嚟一定壓力，溫鋼城認為，現時唔係買歐債嘅好時機，買美債或銀行債會比較簡單。