【全民打新】歡創科技最少2個隱憂「掃」唔走

【Now財經台】今個星期有5隻新股撞期招股，當中2隻有機械人概念，分別係掃地機械人零部件商歡創科技(06802)，同埋機械人技術公司本末科技(06731)，前者孖展超額認購逾700倍，本末孖展就超購逾100倍。歡創去年開始扭虧為盈，本末仲未有錢賺，其實18C特專科技公司普遍都有呢個情況，投資者係咪會偏好歡創？

Blue Water Capital投資總監李澤銘指，歡創可能算比較正常，因為係以收入及利潤作為上市指標，業務亦比較成熟。Alan又指，雖然係機械人概念股，但其實主要做掃地機械人業務，已經係好成熟嘅消費電子產品，有好多消費者熟悉嘅家電品牌都有好多呢類產品，所以市場都比較飽和。

Alan續稱，歡創優點係收入及利潤都趨向穩定，不過，市場競爭好大，增長速度肯定冇初期咁高，整體市場由「藍海」變「紅海」，所以想像空間就唔及人型機械人或工業協作機械人大。