【專家分析】本港租金、樓價靠專才撐起？

【Now財經台】香港首個五年規劃其中1個重點係打造「留學香港」品牌，吸引更多內地及海外學生，在港修讀本地評審全日制專上課程嘅非本地生數目，預期由2024-25學年嘅7.98萬人，增至2029-30學年嘅10萬人，升幅高達25%。早前，差餉物業估價署公布7月嘅樓價指數13連升斷纜，但租金繼續破頂，隨著更多人才及學生來港，係咪可以繼續撐起租金，甚至為本港樓價帶嚟支持？

元宇證券投資總監林嘉麒指，《施政報告》強調，要推進香港成為國際人才集聚高地，並推動專才計劃，再加上積極發展人工智能(AI)、北部都會區、大學城等，唔止非本地生數量增加，更會吸引大批專才來港，尤其係內地專才，佢又話，過去幾年，留學生熱門居住地區嘅租金飆升，亦變相推高樓價。

KK又話，人才集中對本港樓價一定有幫助，但都要視乎供應、租金、回報點樣攞個平衡，近兩年租金回報非常誇張，租金差唔多升咗10%至20%，若未來整體流量再升，而供應相對唔多，有望進一步推高租金，繼而令樓價受惠。