【FINTERVIEW】 若美加兩次息 恒指恐下試22500點(上)

【Now財經台】恒生指數喺6月下旬跌穿23000點，連跌7周後，資金傾向喺低位買貨，現時已失守25000關，加上美國10年期債息升上2007年以來高位，已突破5厘，變相風險資產要重新定價，擔唔擔股市短線有調整壓力，甚至債息持續攀升會引發股災？

東驥基金管理董事總經理龐寶林表示，股市調整壓力大，但港股情況比美股較好，始終恒指已跌咗唔少，但跌幅應該比美股細，如果美國聯儲局今年真係加兩次息，恒指有機會下試今年低位，即22500點水平。

佢又指，投資者可把握今次調整入手高息股，例如航運股，尤其唔受中東戰事影響，兼派息高、盈利又唔錯嘅股份，銀行、電訊股都值得考慮。

Paul續稱，另一個重點係觀望中美元首會面，現時實施制裁等不友善政策係美國嘅策略，今次會面或會傾放寬不友善政策、爭取中方支持各項選舉等，若會談對中美人工智能(AI)發展有理想嘅討論，將有利香港及內地科技股股價。