【FINTERVIEW】美股價值型及細盤股下半年繼續跑贏？(上)

【Now財經台】環球資金喺上半年偏向進取，大幅推升股市，尤其人工智能(AI)相關股，科技股成為表現最標青基金類別。展望下半年，市場風險胃納有冇下降，需唔需要保守返少少？邊啲股份值得留意？

智安投高級財富顧問何展峰表示，上半年日股、韓股嘅AI硬件及晶片股大幅飆升，基金嘅科技板塊升得最勁，但投資者其實忽略咗大中華地區，尤其係A股，其中，中小型企業及生物科技股表現都好好。

下半年投資部署方面，Edwin認為，睇到資金係持續湧入美股，而下半年風險包括美國聯儲局會唔會加息、中東局勢會唔會升溫，以及SpaceX上市後好快已發債融資，而其他科企排隊融資，會唔會抽乾市場資金及風險增加，呢啲都要留意。

佢續指，除咗增長型股票，價值型股票亦都可取，如果從投資角度睇，價值型股票及細盤股，喺上半年跑贏大市，估計長線會繼續跑贏指數。