【智識賺】記憶體荒Apple自食其果？

【Now財經台】蘋果公司(Apple Inc.)同主要記憶體供應商美光科技(Micro Technology)爆發一場火藥味十足嘅罵戰，互相指責對方係導致呢波記憶體價格飆升，同埋供應短缺嘅罪魁禍首，記憶體荒係咪Apple自食其果？美國就Apple向內地記憶體龍頭長鑫存儲採購平價晶片「開綠燈」機會大唔大？

易方資本投資組合經理王逸研指，部分原因的確同Apple有關，集團一直喺整條供應鏈有較強勢地位，加上2023年行業陷入低潮時，3大龍頭把持DRAM(動態隨機存取記憶體)產業95%產能，龍頭有近-20%嘅邊際成本，所以DRAM產業盈利表現慘淡，導致供應商無利可圖，低定價令行業停止大規模擴產，加上依家人工智能(AI)普及到唔同電子裝置，令需求上升，內存倉冇多餘存貨，產能又爆咗，要擴產有一定難道。

Isaac估計，美國准Apple買長鑫存儲平價晶片機會唔大，睇返依家嘅情況，長鑫存儲現時連中國本土需求都滿足唔到，本身已有大量中國客戶，所以須先應付本地客，已經冇多餘產能供應比Apple，就算有都會以市價賣，因為佢都係以市價賣畀中國廠商，所以Apple好難壓價。