【名家給力場】中信資源陳健擬清倉同錢有關？

【Now財經台】中信資源(01205)今日復牌，集團表示，獲主要股東兼非執董陳健告知，由佢控制嘅公司TIHT向TFI Special Opportunities Fund出售公司約10%股權，即約7.86億股，每股作價0.65元，總值逾5億元。點解陳健要清倉持股？係咪對公司前景有憂慮？

《香港股票財技密碼》作者梁杰文指，中信資源業務前景平平無奇，又冇大驚喜，公司有原油業務，但中東局勢似乎緩和，估計年初急升嘅油價，好快會打回原形，公司另一瓣佔比相對大嘅進出口商品貿易業務，雖然近年公司生意額大，規模逾百億元，但每年落到股東手嘅利潤其實有限。

Mike又指，雖然集團近年營運穩定，4年前更開始恢復派息，但上年喺營運冇問題又大賺下，仍取消派息，令4年連續派息嘅紀錄斷纜，呢個可能係陳健心淡嘅原因。