【名家給力場】內地救樓市未必再針對買家出招

【Now財經台】內地近期公布嘅樓市及經濟數據麻麻，雖然內房銷售喺年初有啲起色，但衝刺咗一輪銷售後，5月又再轉弱，尤其係二手樓，銷售keep唔到涉及咩因素？內地樓市嚟緊會點發展？

廣東省地產商會副會長尹德輝認為，近年一線城市嘅樓市銷售好轉，尤其喺減價後出現搶購潮，所以一線都屬於健康。此外，據全國樓市數據顯示，二至四線城市就有啲麻煩，需時慢慢執。

佢續指，現階段房屋供過於求，個市自然唔會升，就算二至四線城市起新樓，都未必吸引到準買家入手，反觀一線城市會穩陣少少，因為一線城市一定會發展、就業，因此，若二至四線城市未來清唔到庫存，都唔會好景。

至於7月舉行嘅政治局會議，佢就話，以往好多扶持政策都係針對買家，但今次政策應該會側重喺負責裝修、建築、材料等公司，甚至相關從業員。