【環球金融快線】「家底厚」Nvidia發債集資有後著

【Now財經台】英偉達(Nvidia)計劃發債集資250億美元，債券年期介乎2年至30年，初步定價指引為美國國債加90個基點。值得留意係，Nvidia過去幾個季度，自由現金流介乎134億至最多逾480億美元，集團資本支出僅逾10億美元，Nvidia有咁強勁嘅現金流，點解仍要發債集資？

易方資本副基金經理王逸研指，Nvidia今次發債嘅息率唔算低，預示投資項目回報率會高過發債成本，相信今次Nvidia發債集資係為入股其他人工智能(AI)公司做部署，包括AI實驗室或終端供應鏈，由於依家有好多新型技術出現令需求上升，導致供應緊張，Nvidia戰略入股呢啲公司，令供應鏈有彈藥擴充產能，提升材料供應質素及生產效率。