【全民打新】入飛抽華健未來前先睇孖展反應

【Now財經台】創新藥B仔股華健未來(06132)今日(12日)開始收飛，下周三(17日)截飛，集團計劃發行1360萬股H股，股數相對較少，上市後股價會唔會較硬淨？公司旗下核心新藥HJ787，係內地唯一處於臨床開發嘅外用選擇性TYK2抑制劑，係咪都要留意內地限制出口或美國制裁等風險？

高歌證券金融首席分析師聶振邦指，華健未來基石投資者約45%，意味市面只得逾700萬股，街貨少會令股價沽壓顯著減少，所以有一定吸引力，不過，參考天辰生物(01779)上市時，首日升幅唔及暗盤，認為依家玩「B仔股」應以短線操作為主。

聶Sir又話，現時新藥仍處於臨床階段，所以擔心制裁係言之尚早，想入飛抽嘅投資者不妨留意下周三截飛前嘅孖展認購反應，若超額認購1800倍或以上，可以考慮借孖展認購。佢又估計，華健未來首掛有望升，不過，若暗盤表現好，或升幅較上市價高50%以上，對謹慎嘅投資者嚟講，止賺會較安全。